Pressmediaofindia
Related Articles
Hyderabad, 22 August (SYED Hussain Ali Sajjad-PMI): Qutb Shahi daur ki 435 saal purani tareekhi imarat Darul Shifa Hospital mein waqeh Alawa-e-Sartouq Hyderabad ke qadeem mazhabi, tareekhi aur saqafati virse ka aham hissa samjha jata hai. Is Ashoorkhane se mansoob riwayat mein Alam-e-Mubarak, is mein mehfooz tabarruk aur Mughal Badshah Aurangzeb ke daur se juda ek mojza khaas ahmiyat rakhta hai, jo duniya ki aankhen kholne ke liye kaafi hai.
Tareekhi hawalon ke mutabiq Alam-e-Sartouq chauthe Imam, Hazrat Imam Zain-ul-Abideen (A.S.) se mansoob hai. Alam-e-Mubarak mein tauq ka ek hissa mehfooz hai, jise waqea-e-Karbala ke baad Imam Zain-ul-Abideen (A.S.) ke gale mein daale gaye kaantedar tauq ka hissa bataya jata hai.
Aurangzeb ka Farman aur Ashoorkhanon ki Masdoodi
Tareekhi shawahid ke mutabiq Deccan mein Qutb Shahi hukoomat ke khatme aur Sultan Abul Hasan Tana Shah ki giraftari ke baad Mughal Badshah Aurangzeb ne mutaddid Ashoorkhanon ki masdoodi ka hukm diya. Isi dauran Alam-e-Sartouq ko bhi zabt karne ki hidayat di gayi.
Yeh khabar milte hi us waqt ke mutawalli Hashmat Ali Baig ne Dar-ul-Shifa se Alam-e-Sartouq ko Jummerat/Itwar Chowk muntaqil karke wahan istada kiya. Jab Alam ki maujoodgi ki ittila Aurangzeb tak pahunchi to use zabt karne ka hukm diya gaya. Taham Badshah ko bataya gaya ke Alam-e-Sartouq se kai mojzat mansoob hain.
Do Haathiyon se Mansoob Waqia
Yeh sun kar Aurangzeb ne Alam se mansoob is mojze ko khud dekhne ki khwahish zahir ki. Alam ko ek haathi ki pusht par rakh kar Ashoor khane se bahar le jaane ki koshish ki gayi. Taham jaise hi haathi aage badha, us ki kamar shaq hone ka waqia pesh aaya.
Is ke baad doosra haathi laya gaya. Muarrikheen ke mutabiq jab Alam ko doosre haathi ki pusht par rakha gaya to us ke saath bhi isi noiyat ka waqia pesh aaya.Hati kamar shigafta ho gae
Is waqia ke baad khud Aurangzeb ne Alam ko zabt karne ke bajaye use istada rakhne ki ijazat di. Taham Itwar Chowk ka Ashoorkhana mahdood raqbe ka haamil hone ke sabab Alam ko Dar-ul-Shifa ki wasee imarat mein dobara muntaqil karne ki hidayat di gayi.
Riwayat mein yeh bhi bayan kiya jata hai ke Badshah ne is maqsad se Alam ko Dar-ul-Shifa muntaqil karne ki ijazat di ke wasee imarat mein use zyada behtar andaaz mein istada kiya ja sake aur ilaqe ke log is se mansoob faiz-o-barkat se mustafeed hon.
Alawa-e-Sartouq Naam Kaise Pada?
Alam-e-Mubarak mein mehfooz tauq ke hisse ki nisbat se is Ashoorkhane ko baad mein Alawa-e-Sartouq kaha jane laga. Maujooda Dar-ul-Shifa ki imarat mein yeh Alam aaj bhi istad hai aur ise Hyderabad ke qadeem mazhabi virse ki alamat samjha jata hai.
Tareekh-danon ke mutabiq tauq ka yeh hissa Agha Mohsin Khurasani 1075 Hijri mein Mulk-e-Sham se Hyderabad laye the. Us waqt Badshah Abdullah Qutb Shah ne ek Alam banwa kar is tabarruk ko Alam mein mehfooz kiya.
Mutawalli Khandan ki Tareekhi Wabastagi
Farman ke mutabiq Aurangzeb ke daur mein Mirza Hashmat Baig Alam-e-Sartouq ke mutawalli the. Bataya jata hai ke mutawalli khandan ka silsila aaj bhi jari hai aur khandan ke afrad nasl dar nasl khidmat anjaam dete aaye hain aur aaj bhi de rahe hain. Woh Alawa se apni wabastagi ka dawa karte hain.
Alawa-e-Sartouq se wabasta afrad ka kehna hai ke is tareekhi maqam ki mazhabi aur saqafati haisiyat ko barqarar rakhna zaroori hai, kyun ke yeh maqam Hyderabad ki sadiyon purani mushtarka tareekhi virasat ka hissa hai.
Maujooda Tanaza aur Mutawalli Khandan ka Mauqif
Marhoom Majawar Asad Ali Baig ke farzand ke mutabiq baaz anasir mabina taur par Alawa-e-Sartouq par qabza karne ki koshish kar rahe hain aur is maqsad ke liye un ke khandan ki maurusi khidmaat khatam karne ki koshish ki ja rahi hai.
Un ka kehna hai ke unhon ne ek siyasi shakhsiyat ko Abdullah Qutb Shah aur Aurangzeb ke farman ko Chatta Bazaar ke dastavezat kehne par aitraz kiya hai, jabke dono badshahon ke farman maujood hain.
Alam-e-Sartouq ki Tareekhi Ahmiyat
Alawa-e-Sartouq se mansoob riwayat ke mutabiq yeh Alam Qutb Shahi daur se maujood hai aur mukhtalif adwar mein is ki hifazat aur istadagi ka silsila jari raha.
Riwayat mein yeh bhi dawa kiya jata hai ke Aurangzeb ne 4 Rajab 1110 Hijri ko jari kiye gaye apne farman mein mazkoora mojzat ka zikr kiya hai.
PMI ki janib se momineen aur qaereen ki dilchaspi ke pesh-e-nazar Alawa-e-Sartouq ki tareekh, Alam-e-Mubarak se wabasta riwayat, tareekhi dastavezat aur maujooda intizami surat-e-haal ke hawale se mazeed maloomati reports ka silsila jari rakha jayega.
Afsoos ke chand shar-pasand log Ayam-e-Aza ke aakhri din, Chup Tazia ke mauqe par, Zarih-e-Mubarak Hazrat Imam Hasan Askari (A.S.) ke hamrah Noha Khwani karne wale Noha Khwan par hamla kar ke unhein zad-o-kob kar rahe hain. In ka maqsad shareef logon ko maar-peet ke zariye apna dabdaba qayam rakhna hai.
Buzurg hazraat ne bataya ke jis ne bhi Alawa-e-Sartouq ki hurmat ko pamal kiya, use apni zindagi mein ruswai mili. Shia baradari ka mutalba hai ke Police Department ko chahiye ke aise waqiat ka azkhud notice lete hue karwai kare.
Note: Alam-e-Sartouq se mansoob mojzat, Aurangzeb ke farman aur deegar waqiat ko is report mein tareekhi aur maqami riwayat ke taur par bayan kiya gaya hai. In ki hatmi tareekhi tasdeeq ke liye asal farman, sarkari record aur mustanad tareekhi dastavezat sabiq mutawalli Hashmat Ali Baig marhoom ke maurusi mutawalli ke paas mehfooz hain. Is ke alawa muarrikheen ne bhi apni tehqeeq aur kitabon mein in ka zikr kiya hai. (pressmediaofindia.com)
