چیف منسٹر سے اسد اویسی کا سوال: چارمینار میں اسمارٹ پارکنگ کیوں رکی ہوئی ہے؟ تا جر اور سیاح مشکلات سے دو چار

Owaisi Presses CM to Fast-Track Multilevel Parking Project at Old Charminar Bus Stand

حیدرآباد30نومبر(پی ایم آئی) آل انڈیا مجلس اتحاد المسلمین (AIMIM) کے صدر اور حیدرآباد کے رکن پارلیمنٹ اسدالدین اویسی نے تلنگانہ کے وزیر اعلیٰ اے ریونت ریڈی سے درخواست کی ہے کہ وہ فوری طور پر پرانے چارمینار بس اسٹینڈ میں مجوزہ ملٹی لیول اسمارٹ پارکنگ منصوبے کے کاموں کو شروع کرائیں، کیونکہ تاریخی علاقے میں پارکنگ کے سنگین مسائل مسلسل بڑھ رہے ہیں۔تقریباً ایک دہائی قبل جی ایچ ایم سی نے اس منصوبے کی تجویز پیش کی تھی، جس کے تحت 3,493 مربع میٹر رقبے پر تین سیلار
(cellar) اور تین منزلوں پر مشتمل جدید پارکنگ کمپلیکس تعمیر کیا جانا ہے۔ منصوبے کے مطابق 145 سے 150 چار پہیہ گاڑیوں اور اتنی ہی تعداد میں دو پہیہ گاڑیوں کے لیے جگہ ہوگی۔

اس کے علاوہ cellar اور گراؤنڈ فلور پر 310 سے 315 چھوٹے ہاکرز کے لیے تجارتی جگہیں بھی فراہم کی جائیں گی، جبکہ عمارت کی چھت پر گارڈن ریستوران اور گزِیبوز بنانے کی تجویز ہے۔زمین کی بیریکیڈنگ کے علاوہ اب تک کوئی عملی پیش رفت نہیں ہوئی۔

جی ایچ ایم سی کے مطابق ٹینڈر جاری کیے گئے تھے لیکن مقامی مسائل کے باعث کوئی بڑی کمپنی بولی میں حصہ لینے کے لیے تیار نہیں ہوئی۔منصوبے کی اہم خصوصیات میں خودکار پارکنگ نظام، ڈیجیٹل ڈسپلے بورڈ، ڈیجیٹل ادائیگی کی سہولت، سی سی ٹی وی نگرانی، فائر سیفٹی سسٹم، ایمرجنسی ایگزٹ اور چھوٹے تاجروں کے لیے مخصوص تجارتی علاقے شامل ہیں۔

اس وقت چارمینار اور اس کے اطراف آنے والے سیاح اور خریدار گاڑیاں کھڑی کرنے میں شدید مشکلات کا سامنا کر رہے ہیں، جس کے باعث وہ چارمینار بس اسٹینڈ اور خلوت گراؤنڈ میں پارکنگ کر رہے ہیں۔ اویسی کے مطابق یہ ملٹی لیول پارکنگ پروجیکٹ مکمل ہونے کے بعد نہ صرف پارکنگ کے مسائل ختم ہوں گے بلکہ مقامی کاروبار کو بھی فروغ ملے گا۔(pressmediaofindia.com)