حیدرآباد، 22 فروری (پی ایم آئی): کوہِ امام ضامن کی اراضی سے متعلق تنازع بڑھتی ہوئی حساسیت اختیار کرتا جا رہا ہے، اور باخبر حلقوں نے سوشل میڈیا مباحث سے آگے بڑھ کر فوری مشترکہ اقدام کی ضرورت پر زور دیا ہے۔
مبصرین کے مطابق اب تک شیعہ رکن وقف بورڈ، کوہِ امام ضامن کمیٹی یا سابق و موجودہ اراکینِ قانون ساز کونسل کی جانب سے کوئی واضح اور مثبت بیان سامنے نہیں آیا، جس کے باعث برادری میں تشویش پائی جا رہی ہے۔
اہم شخصیات نے تجویز پیش کی ہے کہ کوہِ امام ضامن کمیٹی ایک ہنگامی اجلاس طلب کرے اور اس میں ڈاکٹر نثار حسین آغا، الطاف حسین رضوی، ریاض الحسن آفندی اور قمر حسن رضوی کو مدعو کیا جائے تاکہ اراضی کی قانونی حیثیت اور متعلقہ دستاویزات کا جامع جائزہ لیا جا سکے۔
ذرائع نے خبردار کیا ہے کہ بروقت اور شفاف فیصلہ نہ ہونے کی صورت میں مستقبل میں زائرین کو مشکلات کا سامنا ہو سکتا ہے۔ نمائندہ حلقوں کا کہنا ہے کہ یہ صورتحال واضح کرے گی کہ اس متبرک مقام کی اراضی کے تحفظ کے لیے کون عملی قدم اٹھاتا ہے۔ (پی ایم آئی)
