نظام آباد، 19 اکتوبر (پی ایم آئی): نظام آباد پولیس نے شیخ ریاض کو گرفتار کرلیا جو سی سی ایس کانسٹیبل ای. پرمود کے قتل کا اہم ملزم ہے۔ گرفتاری کے دوران علاقے میں انکاؤنٹر کی افواہیں گردش کر رہی تھیں، جن کی پولیس نے سختی سے تردید کی ہے۔
پولیس کمشنر پی. سائی چیتنیا نے واضح کیا کہ ملزم کو زندہ گرفتار کیا گیا ہے۔ ایک خفیہ اطلاع پر پولیس نے سارنگاپور جنگل علاقے میں کارروائی کی، جہاں ریاض اور آصف نامی شخص کے درمیان جھڑپ ہوئی۔ اس دوران دونوں زخمی ہوئے، جنہیں بعد میں سرکاری اسپتال منتقل کیا گیا۔
تفصیلات کے مطابق 24 سالہ ریاض، جو ہاشمی کالونی کا رہائشی ہے، نے جمعہ کی رات وِناایک نگر میں کانسٹیبل پرمود کو چھری کے وار سے قتل کر دیا تھا، جب پولیس اسے موٹر سائیکل پر اسٹیشن لے جا رہی تھی۔ واردات کے بعد وہ موقع سے فرار ہوگیا تھا۔
اس واقعہ پر ڈی جی پی بی. شیودھر ریڈی نے سخت نوٹ لیتے ہوئے خصوصی ٹیمیں تشکیل دینے کی ہدایت دی تھی تاکہ ملزم کو جلد از جلد گرفتار کیا جا سکے۔ پولیس نے ریاض کی گرفتاری پر 50 ہزار روپے انعام کا اعلان بھی کیا تھا۔
پولیس کے مطابق ریاض کے خلاف ڈکیتی، قتل اور چوری سمیت کئی سنگین مقدمات درج ہیں۔ کانسٹیبل پرمود کے بہیمانہ قتل پر پولیس محکمے اور عوام میں شدید غم و غصہ پایا جا رہا ہے۔
