Milad-un-Nabi Procession Concludes Peacefully, Hyderabad Showcases Communal Harmony
حیدرآباد، 14 ستمبر(پی ایم آئی): حیدرآباد میں میلاد النبیؐ کے موقع پر نکالا گیا عظیم الشان جلوس اتوار کو پرامن طور پر اختتام پذیر ہوا، جس میں ہزاروں عقیدتمندوں نے شرکت کرتے ہوئے حضور اکرمؐ کی ولادت باسعادت کا جشن منایا۔
مرکزی جلوس چارمینار سے شروع ہوا اور گلزار حوض، پاترگٹی، مدینہ بلڈنگ، نیا پل، دارالشفا، منڈی میرعالم، علیجہ کوٹلہ سے گزرتا ہوا مغلپورہ پر ختم ہوا۔ پرانے شہر کے مختلف علاقوں بشمول فلک نما، شاہین نگر، وٹے پلی، بندلہ گوڑہ اور حافظ بابا نگر سے بھی چھوٹے جلوس مرکزی جلوس میں شامل ہوئے۔
شرکاء نے قومی پرچم اور دیگر جھنڈے لہراتے ہوئے نعرہ تکبیر اور صلوات کے نعرے بلند کیے جبکہ بعض مقامات پر فلسطینی عوام کے ساتھ یکجہتی کے طور پر فلسطینی پرچم بھی لہرائے گئے۔ جلوس کے راستے میں لنگر اور فوڈ کیمپس لگائے گئے جہاں پر بریانی، حلیم، بگارہ چاول اور دیگر پکوان پیش کیے گئے۔ بچوں میں مٹھائیاں بھی تقسیم کی گئیں۔
اس مرتبہ پہلی بار چارمینار کو سیاحوں کے لیے مکمل دن بند رکھا گیا۔ گزشتہ برس یہ صبح کھولا گیا تھا اور جلوس کے آغاز کے بعد بند کیا گیا تھا۔
پرامن جلوس کے انعقاد کے لیے تین ہزار سے زائد پولیس اہلکاروں کو تعینات کیا گیا۔ ان کے ساتھ ریپڈ ایکشن فورس، سٹی آرمڈ ریزرو، کوئیک ریسپانس ٹیم اور ٹاسک فورس کے دستے بھی شامل تھے۔ سینئر پولیس عہدیداروں نے بذاتِ خود جلوس کی نگرانی کی۔
مرکزی میلاد جلوس کمیٹی نے اس سال جلوس کو گنیش وسرجن سے متصادم ہونے سے بچانے کے لیے ایک ہفتہ مؤخر کرنے کا فیصلہ کیا تھا، جسے عوامی حلقوں نے شہر میں امن اور فرقہ وارانہ ہم آہنگی کو برقرار رکھنے کے لیے خوش آئند اقدام قرار دیا۔(pressmediaofindia.com)
