08-05-2025
نئی دہلی : ہندوستان اور پاکستان کے درمیان پہلگام دہشت گردی اور پھر آپریشن سیندور کے بعد فوجی تناو نے تمام حدوں کو پار کرلیا ہے ۔ بدھ کی شب پاکستان کے حملے کی کوشش کے بعد جمعرات کی صبح ہندوستان نے لاہور ھر ڈرون سے حملہ کیا تھا اور رڈار نظام تباہ کردیا تھا۔ اس سلسلے میں کرنل صوفیہ قریشی نے آج میڈیا کو اہم جانکاری دی۔ ایک پریس بریفنگ کے دوران انھوں نے کہا کہ ’’ہم نے آپریشن سندور کے بعد منعقد پریس کانفرنس میں بتایا تھا کہ ہم نے کسی بھی فوجی ٹھکانوے کو نشانہ نہیں بنایا ہے۔ گزشتہ شب پاکستان نے ہندوستان کے کئی فوجی ٹھکانوں پر ڈرون اور میزائل سے حملہ کرنے کی کوشش کی، جسے ناکام کر دیا گیا ہے۔ اس کاملبہ بھی برآمد ہوا ہے۔
پاکستان کا ڈرون اور میزائل حملہ ناکام
7 مئی کی رات پاکستان نے ہندوستان کے متعدد فوجی ٹھکانوں کو ڈرون اور میزائلوں کے ذریعہ نشانہ بنانے کی کوشش کی۔ جموں، پٹھان کوٹ، اونتی پورہ، سری نگر، امرتسر، چنڈی گڑھ اور بھج سمیت شمالی و مغربی ہندوستان کے پندرہ سے زائد مقامات پر حملے کیے گئے۔ کرنل صوفیہ قریشی کے مطابق، ’’ہندوستانی ایئر ڈیفنس اور انٹگریٹیڈ کاؤنٹر یو اے ایس گرڈ نے ان تمام حملوں کو ناکام بنا دیا، اور ان کا کوئی بھی ہدف کامیاب نہ ہو سکا۔‘‘
حملوں کے ملبے سے پاکستانی عزائم بے نقاب
کرنل صوفیہ نے بتایا کہ کئی مقامات سے حملوں کا ملبہ برآمد کیا جا چکا ہے، جس سے صاف ظاہر ہوتا ہے کہ یہ میزائل اور ڈرون پاکستان سے بھیجے گئے تھے۔ انھوں نے کہا کہ ’’یہ ملبہ ہمارے دعوے کی تصدیق کرتا ہے کہ پاکستان نے ہمارے فوجی انفراسٹرکچر کو نشانہ بنانے کی کوشش کی تھی۔‘‘
آپریشن سندور کے تحت مخصوص اہداف پر حملہ
کرنل صوفیہ نے اپنی پریس کانفرنس میں دہرایا کہ 7 مئی کو آپریشن سندور کے دوران ہندوستان نے صرف دہشت گرد ٹھکانوں کو نشانہ بنایا تھا اور کسی بھی پاکستانی فوجی تنصیب پر حملہ نہیں کیا گیا تھا۔ ’’ہم نے پہلے ہی خبردار کیا تھا کہ اگر ہندوستان پر کوئی حملہ ہوا، تو اس کا مناسب جواب دیا جائے گا،‘‘ کرنل صوفیہ نے کہا۔
ہندوستان کا منظم اور مؤثر رد عمل
پاکستان کی اشتعال انگیزی کے جواب میں 8 مئی کی صبح ہندوستانی مسلح افواج نے پاکستان میں متعدد مقامات پر واقع ایئر ڈیفنس رڈارز کو نشانہ بنایا۔ کرنل صوفیہ نے انکشاف کیا کہ ’’لاہور میں موجود ایک ایئر ڈیفنس سسٹم کو مکمل طور پر بے اثر کر دیا گیا ہے۔ ہمارا رد عمل نہ صرف علاقائی سطح پر برابر تھا بلکہ تکنیکی اعتبار سے بھی اتنا ہی درست تھا۔‘‘
سیکیورٹی فورسز مکمل طور پر الرٹ
موجودہ حالات کو دیکھتے ہوئے سرحدی علاقوں میں سیکیورٹی فورسز کو ہائی الرٹ کر دیا گیا ہے۔ ہندوستان نے واضح پیغام دیا ہے کہ ملک کے خلاف کسی بھی قسم کی جارحیت کا جواب نہایت سخت اور نشانے پر ہوگا۔
پس منظر: پہلگام حملے سے کشیدگی کی شروعات
یہ ساری صورتحال 22 اپریل کے پہلگام دہشت گردانہ حملے کے بعد شروع ہوئی، جس میں 26 معصوم شہری جاں بحق ہوئے تھے۔ اس کے بعد ہندوستان نے ’آپریشن سندور‘ کے تحت دہشت گردوں کے لانچ پیڈز کو نشانہ بنایا، اور یہ واضح کیا کہ وہ اپنی سرزمین پر حملے کو برداشت نہیں کرے گا۔
