ممبئی عدالت نے تبدیلیٔ مذہب کے پہلے مقدمہ میں مسلم نوجوان کو قبل از گرفتاری ضمانت منظور کرلی

عدالت نے قرار دیا کہ کسی ہندو خاتون کا برقعہ پہننا یا شادی کے دعوت نامے پر مسلم نام درج ہونا، جبری تبدیلیٔ مذہب کا ثبوت نہیں ہے۔

ممبئی، 22 نومبر ( پی ایم آئی): ممبئی کی ایک سیشن عدالت نے ہندو خاتون کو مبینہ طور پر زبردستی اسلام قبول کروانے کے الزام میں مقدمہ کا سامنا کرنے والے ایک مسلم نوجوان کو قبل از گرفتاری ضمانت منظور کرلی ہے۔ اسے مہاراشٹر کے نئے نافذ کردہ قانون برائے تحفظِ مذہبی آزادی 2026 کے تحت ممبئی میں درج ہونے والا پہلا مقدمہ قرار دیا جا رہا ہے۔

ممبئی کے ڈنڈوشی میں واقع سٹی سول اینڈ سیشن کورٹ کی ایڈیشنل سیشن جج پی اے سانے نے 20 نومبر کو یہ حکم جاری کیا۔ اس معاملے میں خاتون کی والدہ نے شکایت درج کروائی تھی، جس میں غیر قانونی طور پر مذہب تبدیل کروانے کا الزام عائد کیا گیا تھا۔

سماعت کے دوران شکایت کنندہ اور استغاثہ کی جانب سے شادی کے دعوت نامے کو بطور ثبوت پیش کیا گیا، جس میں ہندو خاتون کے نام کے ساتھ مسلم نام درج تھا۔ اس کے علاوہ خاتون کی برقعہ پہنے ہوئے ایک تصویر بھی پیش کی گئی، جسے مبینہ تبدیلیٔ مذہب کے ثبوت کے طور پر پیش کرنے کی کوشش کی گئی۔

تاہم عدالت نے مشاہدہ کیا کہ جوڑے نے 16 اکتوبر کو قانونی طریقۂ کار اور مقررہ نوٹس کی تکمیل کے بعد اسپیشل میرج ایکٹ کے تحت اپنی شادی رجسٹر کروائی تھی۔ عدالت نے یہ بھی نوٹ کیا کہ پولیس نے ایک مولوی کے پاس سے جو رجسٹر ضبط کیا تھا، اس میں اس جوڑے کے نکاح کی کوئی تفصیلات درج نہیں تھیں۔

متعلقہ خاتون خود عدالت میں حاضر ہوئی اور واضح طور پر بیان دیا کہ اس نے اپنی مرضی اور رضامندی سے شادی کی ہے اور اس پر کسی قسم کا دباؤ، جبر، دھمکی یا لالچ نہیں ڈالا گیا۔

جج پی اے سانے نے استغاثہ کی جانب سے پیش کردہ شواہد کی قانونی حیثیت پر سوال اٹھاتے ہوئے کہا کہ محض شادی کے دعوت نامے پر مسلم نام درج ہونے یا کسی خاتون کے برقعہ پہننے سے مذہب کی تبدیلی ثابت نہیں ہوتی۔

عدالت نے اپنے حکم میں واضح کیا کہ نکاح کی ادائیگی کا کوئی ریکارڈ موجود نہیں ہے اور صرف برقعہ پہنے ہوئے تصویر کی بنیاد پر یہ نتیجہ اخذ نہیں کیا جاسکتا کہ خاتون نے اسلام قبول کرلیا ہے۔

جج نے مزید مشاہدہ کیا کہ دونوں کے درمیان کورونا وبا کے دور سے ہی محبت کا تعلق تھا اور دونوں بالغ ہیں۔ عدالت کے مطابق جبری تبدیلیٔ مذہب، دھوکہ دہی یا لالچ دینے کے شواہد موجود نہ ہونے کی صورت میں قانون کی دفعہ 3 کے تحت عائد الزامات کو بادی النظر میں ثابت کرنا مشکل ہے۔

عدالت نے قرار دیا کہ ملزم سے حراست میں پوچھ گچھ کی ضرورت نہیں ہے۔ چنانچہ اسے 50 ہزار روپے کے شخصی مچلکے پر قبل از گرفتاری ضمانت منظور کرلی گئی۔

ملزم کی جانب سے ایڈوکیٹس کریم پٹھان، فضل شیخ اور پی پی تیواری نے پیروی کی، جبکہ ریاست کی جانب سے ایڈیشنل پبلک پراسیکیوٹر آر ایس کانو جیا پیش ہوئے۔ شکایت کنندہ کی جانب سے ایڈوکیٹ ابھیشیک دوبے نے نمائندگی کی۔

عدالت کا یہ فیصلہ اس اعتبار سے اہمیت کا حامل ہے کہ محض کسی خاتون کا برقعہ پہننا یا شادی کے دعوت نامے پر مسلم نام درج ہونا، اپنے آپ میں جبری تبدیلیٔ مذہب کا ثبوت نہیں بن سکتا۔ تاہم عدالت کا یہ حکم اسی مقدمے میں پیش کردہ شواہد اور حالات کے تناظر میں ہے۔

اس خبر پر اپنی رائے کا اظہار کریں

اپنا تبصرہ بھیجیں