ایران جنگ پر امریکہ کے 48 ارب ڈالر سے زائد خرچ، پینٹاگون کے نامزد عہدیدار کا انکشاف

ایران کے ساتھ جنگ پر امریکہ کے اب تک 48 ارب ڈالر سے زائد خرچ ہو چکے ہیں۔ پینٹاگون کے ایک نامزد عہدیدار کے مطابق اس رقم میں مشرقِ وسطیٰ میں ایرانی حملوں سے متاثر ہونے والی امریکی فوجی تنصیبات کی مرمت کے اخراجات شامل نہیں ہیں۔

امریکی بحریہ کے مالیاتی امور اور کمپٹرولر کے اگلے اسسٹنٹ سیکریٹری کے لیے نامزد آرتھر ملر نے جمعرات کو سینیٹ کی آرمڈ سروسز کمیٹی کی سماعت کے دوران جنگ کے اخراجات سے متعلق یہ اعداد و شمار پیش کیے۔

ملر کے مطابق اس تخمینے میں اسلحے اور گولہ بارود، فوجی سازوسامان کی تبدیلی اور فوجی آپریشنز کے اخراجات شامل ہیں، تاہم تباہ یا متاثر ہونے والی فوجی تنصیبات کی مکمل مرمت کے اخراجات اس میں شامل نہیں کیے گئے۔

جنگ کے اخراجات میں مسلسل اضافہ دیکھا جا رہا ہے۔ رواں سال جولائی میں امریکی وزیر دفاع پیٹ ہیگسیتھ نے سینیٹ کو بتایا تھا کہ جنگ پر تقریباً 37.5 ارب ڈالر خرچ ہو چکے ہیں، جو اس سے قبل جاری کیے گئے سرکاری تخمینے سے تقریباً 8 ارب ڈالر زیادہ تھے۔

اکتوبر کے اختتام پر خبر رساں ادارے رائٹرز نے رپورٹ کیا تھا کہ جنگ کے اخراجات 47 ارب ڈالر سے تجاوز کر چکے ہیں۔

تازہ ترین اعداد و شمار سے ظاہر ہوتا ہے کہ جنگ کے باعث امریکہ پر مالی بوجھ مسلسل بڑھ رہا ہے، جبکہ فوجی تنصیبات کی بحالی اور مرمت کے اخراجات شامل ہونے کے بعد مجموعی رقم میں مزید اضافہ ہو سکتا ہے۔

اس خبر پر اپنی رائے کا اظہار کریں

اپنا تبصرہ بھیجیں