حیدرآباد۔/11 جنوری، سنکرانتی کی تعطیلات کے موقع پر شہر کی عوام اپنے آبائی مقامات کو روانہ ہونے کے پس منظر میں حیدرآباد پولیس نے عوام الناس کیلئے احتیاطی تدابیر کا مشورہ دیا ہے۔ ایڈیشنل کمشنر کرائمس مسٹر اے آر سرینواس نے عوام کو یہ مشورہ دیا ہے کہ تعطیلات کے دوران مکان میں غیر موجودگی پر قیمتی اشیاء نہ رکھیں اور طلائی زیورات وغیرہ اپنے بینک لاکرس میں محفوظ رکھیں۔ انہوں نے مشورہ دیا کہ اپنے مکان کے سی سی کیمروں کی کارکردگی جانچ کرلیں اور گھر چھوڑ کر جانے کے دوران مکان میں روشنی کا خیال رکھیں۔ تعطیلات میں آبائی مقام کو روانگی سے قبل نیوز پیپر ہاکرس اور دودھ سپلائی کرنے والے افراد کو اپنی غیر موجودگی کے بارے میں پہلے سے ہی اطلاع دیں۔ انہوں نے عوام کو مشورہ دیا کہ تعطیلات کے دوران احتیاطی تدابیر کا خاص خیال رکھیں تاکہ واپس لوٹنے پر انہیں مایوسی کا سامنا کرنا نہ پڑے۔
