حیدرآباد،20مارچ (پی ایم آئی) سٹی پولیس حیدرآباد نے شہر میں ملاوٹ شدہ اور غیر محفوظ خوراک کے خلاف کارروائی کو مضبوط بنانے کے لیے ایک خصوصی ٹیم “H-FAST” قائم کر دی ہے۔ یہ اقدام حیدرآبادمیں عوامی صحت کے تحفظ کے لیے ایک اہم قدم قرار دیا جا رہا ہے۔
یہ ٹیم پولیس کمشنروی سی سجنار کی نگرانی میں کام کرے گی اور فوڈ سیفٹی حکام کے ساتھ قریبی رابطے میں رہے گی تاکہ قوانین پر سختی سے عمل درآمد یقینی بنایا جا سکے۔
اس یونٹ کا افتتاح ڈپٹی کمشنر آف پولیس گا ئیکوارڈ ویبھو رگھو ناتھ نے کیا، جس کے ساتھ ہی ملاوٹ شدہ خوراک کے خلاف ایک منظم اور انٹیلی جنس پر مبنی نظام کا آغاز ہو گیا۔H-FAST ٹیم میں 28 اہلکار شامل ہیں، جن میں انسپکٹرز، سب انسپکٹرز اور دیگر عملہ شامل ہے۔
یہ ٹیم شہر بھر میں نگرانی، چھاپے اور کارروائیاں کرے گی تاکہ غیر معیاری اور مضر صحت خوراک کی فروخت کو روکا جا سکے۔عوام کی سہولت کے لیے ایک ٹول فری نمبر 8712661212 بھی جاری کیا گیا ہے، جس پر شہری ملاوٹ شدہ خوراک سے متعلق شکایات درج کرا سکتے ہیں۔ اس کے علاوہ سوشل میڈیا پلیٹ فارمز کے ذریعے بھی اطلاع دی جا سکتی ہے تاکہ فوری کارروائی ممکن ہو۔
حکام نے واضح کیا ہے کہ خوراک میں ملاوٹ ایک سنگین جرم ہے جو عوامی صحت کے لیے خطرہ بن سکتا ہے۔ اس کے خلاف زیرو ٹالرنس پالیسی اپنائی جائے گی اور ملوث افراد کے خلاف سخت قانونی
کارروائی کی جائے گی۔یہ اقدام حالیہ کارروائیوں کے بعد اٹھایا گیا ہے، جن میں ملاوٹ شدہ اچار بنانے والی ایک فیکٹری کا بھانڈا پھوڑا گیا اور کئی دکانوں پر چھاپے مار کر ناقص پنیر اور ڈیری مصنوعات ضبط کی گئیں(Pressmediaofindia.com)
